7劇團推"伏魔英雄帖" 臺灣頭1齣光雕布袋戲 - 布袋戲

https://news.pts.org.tw/article/561088

7劇團推"伏魔英雄帖" 臺灣頭1齣光雕布袋戲

洪敏真 林郁凱 / 臺北報導 發布時間：2021-12-30 19:15 更新時間：2021-12-30 19:54

https://www.youtube.com/watch?v=H6rN0x62AdI

為著予藝文經濟會當萬年永久，袂少國家攏有固定時間、固定地點的表演，像美國百老匯
就是一个例，這陣臺灣的「新勝景掌中劇團」，招全臺灣7个掌中劇團，年底大戲「伏
魔英雄帖 再現白光劍」，是全臺灣頭一齣結合傳統跤步手路，閣有光雕的布袋戲。

對石卵吸收天地靈氣，破殼而出成做一隻叫紅羅剎的妖龍，準備大鬧天界、消敨怨氣。

紅羅剎化做人體，危害人間，唯有各路英雄團結伏魔，才通太平盛世。

伏魔英雄帖口白主演，王英俊表示：「這改是一个真大的突破，布袋戲有的講忠孝節義，
有的嘛有可能是行俠仗義，這齣戲我感覺伊有一个中心思想，就是團結。」

伏魔英雄帖編導，朱祥溥表示：「阮希望開發一个B2C的商業模式，這个商業模式若成功
，等觀光客回流的時陣，伊會使親像越南水上木偶劇的表演形式，逐年固定的時間、特定
地點，攏有人入來看戲。」

編劇導演朱祥溥發揮動畫專長，阿兄就佇台頂弄尪仔，傳承新勝景掌中劇團第一代團主的
心願。毋但光雕佈景顯目傳奇，就連野台戲的戲台，也整個搬入台北西門紅樓，呈現往過
內台戲園、布袋戲上繁華的時代。

新西園掌中劇團團主，許正宗表示：「上歡喜的就是全國所有老中少攏聯合做伙，一寡
新觀眾出來。」

陳錫煌藝生，陳冠霖表示：「會佮意這藝術的人，會來從事這个行業的人，伊袂驚枵腹肚
啦，腹肚縖較絚咧，因為這是伊的興趣嘛。」

這齣由新勝景掌中劇團率領的伏魔英雄帖，用顯目的動畫和燈光技術，招南北二路，計共
七个布袋戲掌中劇團參雲林在地打擊樂團，對2021年底相連紲四工，團結仝心，期待發展
做固定形式、地點的常態性表演模式，予傳統藝術新年也有新風貌。


--